يمه(حسن)

موضوع: يمه(حسن) الأربعاء سبتمبر 02, 2009 3:12 am

[center]يبني أنه شديت العمر كله عليك
الشدة جانت مو الي وبينت عليك
جنت ادعي من الله تكبر
وتضمد جروح الخزنت يمة بايديك
أه يبني وياحسافة عله السنين
طشرت أفراح العمر وتغربيت
وآنه بعدك مالي حيل
وبنشدتك يبني تراني تعثريت
وانشدت كل الشواطي عليك يبني وما دريت
ورحت يمة للمكابر وسألت عنك أهلهه
كالوا هناكه حسن مزوج وبانيله بيت
وآنه يبني تأخرت عن زفتك
هسه انه اسمعت يبني وتوه اجيت
يبني أكعد جايبتلك خرز دعبل
ونفاخة وحلاوة ونامليت...
*********
صار ديواني الحزن صبح ومسية
وصارت الليلة طويلة وما غفيت
و انه كلتلهم حجي هوايه عليك
يبني ما ظن قصريت...
وظلوا ياجيران كنوني بأسم أبني وبجيت
راح من ايدي وبكة بس اسمه ذكرى..
يمه حلوة من يصيحولي أم حسن
احلا منهه بهاي ارض الله الوسيعة ما لكيت
و انه اطش شوباش عرسك كل سنه
بلكت اهناكه يغالي عريسيت
ومن تعرس اذكر امك ياحسن
وسولف لحورك عليه
وبوسهه بكصتهه بمجان الاحبك..
وكلهه أمي بكل صلا تسلم عليج
وخل تسامحني لان انه عليه تاخريت
وامسح خدود العروسة
بأحلا بوسه
يله يمة رايحة بوداعت الله
ادري بيك تريد تسأل عن خواتك
و ادري لو تحجي... علهن سلميت
انه اكلهم سلم عليكم حسن
صدك يمة والله سلم....
و الله يمة سلم عليكم
وسأل عن الزغيرة و الجبيرة
و هاي جابلكم حلاوة وبارميت
و هاي جابلكم حلاوة وبارميت
أبو سجاد المنصور
بصرة الفاو 2009