أبو ذيّات ولائيه

يدنيه علي كشري انيابج وصولي
انا شيعي وجعفري المذهب واصولي
ومن بيت النبي ما أقطع وصولي
لو يضل ممشاج وي ضدي عليه

يهل أسمه ورد أحمد وطـه
وزهت كل أرض جدمه وطاها
خديجه أنجبت زهره من وطاها
شفيعه اصبحت لهل البريه
* * *
علي اسمك سحر عقلي وجنه
ثلاث احروف الغزن قلبي وجنه
صرت بيهن عايش بروضه وجنه
وبيهن انتخي لو ناب الدهر بيه
* * *
حوايجنه ابضعة الهادي نسلها
الحسن وحسين هلطيب نسلها
النواصب من نمدح العتره نسلها
ونسل كلمن يقتدي بآل أميه

* * *

تباهى الكرم من صار لحسن خصله
كضاها بجود لا بيت من القصب خصله
يدفن ذهب بالزاد لو ضيف الكرم خصـله
أبن طـه النـبي وبن بـته او وصـيه



* * *

حسين اللي وضع للكون منهاج
الشعب بسمه هتف يوم انتفض من هج
وبتربته سكن موج البحر منهاج
وطواغيت الكفر ذلت بالوطيه
* * *
علي السجـاد يازينـة عـباده
يهل أسـمه صفه وحـده عباده
وي تميم اصبحت تنعى عبــاده
ودمع عينه يهـل لو شرب ميــه
* * *
يهل باقر علوم الكون بعلم جده
يغيض اسمك علوج الشام وأهل جده
نوابغهم من تجد ماتصل معشارجده
تضل انته البحر ما يجف ميه
**
اريد املي بحبر قلمي وصادق
تفاخرنه باسم جعفر وصادق
نهج النه ثبت الهم وصادق
ونهج اعداه زايف بالبريه



* * *


يغيض الكظمته ما كظم بالكون واحد
خلصت العمر لوعات موش بسجن واحد

غيرك يعبد الدنيا وانته عبدت واحد
يبــاب الحوايـج لاذوا ابفــيه



* * *

يدري بالقدر من يصيبه ورضا
ولهاذا السبب يسمونه رضا
من بيت الرساله والقول منه رضا
أعلام الهدايه وهم أهل الحميه
* * *
تشهدله العوالم من صغر سنه
موش احنه النقوله دونت سنه
أفعالك يابو الحسن للنبي سنه
* على نهجه تسير ومنهج وصيه
* * *
سلامي احمل يقاصد ارض سامره
لثامن وصي وياك والمضـلوم مره

عمره أنقضى لوعات مره بأثر مره
عليه شما جريت ادموع بالأجر هيه

* * *

يزايرتحيات أخذها وياك ودهه
للعسكري اللي كسب هالروح ودهه
لظهور ابنك تتنطر وكل ساع ودهه
طالت غيبته وشمتو العدوان بيه
* * *

اللي نكر وعدك يامهدي ياله منك
وبعدهـه جروح جدك يالمنـك
عهد مكتوب من ربك يالـه منك
تاخذ بثار الكضو بالغاضــريه
***
علي يامـصدر القـوة والايمـان
ردتك للحشر ذخري ولي امان
بلحدي من يحضر حسابي ولي من
غيرك لو ثكلن ذنوبي عليــه
* * *
بالعين اسمه ابتده من نخطه ولي
من دون كل البشر ربك اختاره ولي

واصبح شفيع الكم يا محبينه ولي
قسيم النــار والجنـه سويــه